This is another story of Monika, but as an experiment I'm going to write it in Swiss German. Apologies to literally everyone else who might read this as I doubt you'll ever be able to. I'd love it if you could, though! The title means ‘Summer days’.
“Ach das glaubt mer ja nid!” schreit d Monika fruschtriert. Si hämmeret mit ihrne Füüschtli wi wild uf dä Pult. Will si aber scho no äs sanfts gschpängschtli isch machts nöd allzu vill Lärm im Ruum. Si hört au softort wieder uuf, bsorgt dass d Lüüt si würdet komisch aaglotze. D Monika hasst Bibiliotheke. Es isch alles so verknirscht und erzwungä und mer dörf nüt aners mache als ruig daasitze. Mürrisch wändet si sich wider ihrne Ufzgi zue. Im Momänt bereitet ihre d Mathe grad bsunders Sorgä. Irgendwie, egal was si au versuächt, chann si gar nöd uf d Lösig wo im Buech staat choo.
Nach es paar wiitere Versüech wo ali gliichfalls is Wasser gfallä sind, stöhnt si und wirft ihre Chopf zrugg. Si starrt a d Decki und fangt aa umeblööterle. Si maalt sich es paar Szenarie uus wie doch de Tag no interessant wärde chönnt, aber au das wird schnäll langwiilig. D Monika wirft en böse Blick i d Richtig vo ihrne Notize. “So en absolute Seich” flüschteret si liislig. Dänn fasst si de Entschluss dases kein Sinn machi no wiiter a dem Quatsch umezfiddle. Iifrig packt si ihres Zeugs zeme und spurtet us de Bibiliothek use. Froh dass si us dem stickige Ruum use isch haltet si churz aa zum de schöni Tag bewundere. Äs wär doch au fascht e Sünd so en schöne Tag i sonnere grüslige Bibliothek z versaue, dänkt si sich.
Ufem Wäg heimet macht si aber no en Umwäg dur de Park. Will si sogar no es freis Bänkli ufstöbere het chöne sitzt si ane und fangt aa es Buech z läse. Ab und zue beobachtät si di andere Lüüt wo so dur de Park spazieret. Ab und zue gitz es Liebespäärli wo verträumt dehiischlenderet, hie und da en Räntner oder e Huusfrau. Eis vo de Monika ihrne lieblingsspiili isch sich vorzstelle wie mer all die Lüüt chönnti i e ganz komplizierti und fantastischi Gschicht verwickle. Meischtens werdet die aber so kompliziert dass si sälber nümm weiss wie denn ales zämepasst oder überhaupt ersch aagfange hät.
Wills Buech doch nödeso spannend isch wie si sich erhofft hett hört si au bald wider uuf z läse und fuulenzt es Wiili i de Sunne. Es duuret au nid all zu lang da dööst si vor sich hii. S goisse und giggle vomene chind wo i de Ferni mit siine Eltere spillt weckt si wider uuf. D Monika blinkt. Will si kei Uhr bisich hett weiss si nid wie spoot's den au scho worde isch. E chli besorgt dass si vilicht scho vill z vill Ziit vertöörlet hegi macht si sich au wider uf de Weg hei.
Written by shinmera